Vekesprodukt: Speltkjeks m/Rørossmør

Nå er det på tide å vise fram denne veldig gode speltkjeksen frå Den Gode Baker i Stokke i Vestfold att. Han inneheld sammale og sikta spelt, Rørossmør og Himalayasalt, og er laga av norske ingrediensar så langt det lar seg gjera.  Kjem du innom torsdag, fredag eller laurdag skal du få smaksprøve av kjeksen, og vi sprettar ei krukke med pesto frå Helios som tilbehør.

Ønskjer du å lesa meir om Den Gode Baker, kan du titte her.

Opningstider i påsketida:

Måndag 15/4 og tysdag 16/4:       Kl. 10.00 – 17.00
Onsdag 17/4:                                           Kl. 10.00 – 15.00
Laurdag 20/4 (Påskeaften):           Stengt

Tysdag 23/4:                                            Kl. 10.00 – 16.00
(til vanleg stengt tysdagar)

God, gulgrøn påske!

Vekesprodukt: Lammekotelettar frå Heidal

Som vekesprodukt nå rett før påske kan vi tilby lammekotelettar frå Heidal Gammelnorsk Spælsau v/Bård Bårdløkken. Vi kan varmt anbefale lammekotelettar med lammekrydder frå Aukrust! Dette kan du koma innom oss og smake på torsdag, fredag og laurdag.

Vi kan òg tilby andre slag lammekjøt frå same produsent. Kjøtet er ikkje økologisk godkjend, men sauane er grasfora og har gått i fjellet heile sommaren. Gammalnorsk spelsau er nøysam og utnyttar utmarksbeitet godt. Sauane er slakta av Nortura og pakka og foredla av Heidal landbruksprodukter.

Her finn du nokre fristande lammekjøtoppskrifter:
https://meny.no/oppskrifter/Lam

Grøn dyrkingskveld i Vågå

Har du lyst til å veta meir om dyrking av eigen mat utan bruk av sprøytemiddel og kunstgjødsel?
Da er du hjarteleg velkomen til å koma og lære meir om økologisk dyrking på
Ullinsvin (prestegarden) i Vågå,
tysdag 9. april kl. 19.00!

Den erfarne urtedyrkaren Ågot Råstad vil fortelja om urtedyrking og grønsaksdyrkar Per Stabell vil lære oss meir om kompostering.
Grøn tråd sel økologiske frø frå det norske frøselskapet Solhatt.
NB! Kun kontantsal.
Gratis inngang, spleis på te, kaffe og biteti.
Velkomen til ein skikkeleg grøn kveld!

Grøn helsing frå
Randi Bjørnstad og Trude Lyngby i Grøn tråd,
samt Ågot Råstad og Per Stabell

Egg frå Aukrust i Lom

På den biodynamiske urte- og grønsaksgarden Nordgard Aukrust i Lom trippar det frittgåande og glade høner, som får økologisk fôr og legg brune egg. Desse fine og ikkje minst gode egga er vekesproduktet vårt denne veka, så torsdag, fredag og laurdag kan du gjerne innom og få smake på dei sjølv!

Grøn tråd til sals!

Har du lyst til å bli eigar av Grøn tråd?

Vi har tenkt på å gje oss, men ser veldig gjerne at Grøn tråd får leva vidare. Derfor legg vi nå bedrifta ut for sal.

Grøn tråd er ein økologisk landhandel med trivelege lokaler sentralt på Otta, med fokus på stuttreist og lausvekt.

Ta gjerne kontakt på tlf. 900 58 159.

Grøn helsing frå
Randi og Trude,
Grøn tråd

Vårmorgon-te frå Aukrust i Lom

Det er vår, og da må det vel vera på sin plass med Vårmorgon-te frå Aukrust gard og urteri i Lom?

Denne urte-teen inneheld pepparmynte, grønmynte, bjørkeblad, løvetannrot og -blome , einer og ryllik. Fleire av desse urtene har ord på seg for å vera rensande, dvs. at dei hjelp til med å fjerne giftstoff frå kroppen.  Denne teen smakar òg veldig godt, t.d. til frukost. Vi har smaksprøve av teen torsdag, fredag og laurdag, så kom gjerne innom for ein smak!

Aukrust gard og urteri kan du lesa meir om her og her.

 

Vekesprodukt: WannaBe kombucha frå Ask Brygghus

WannaBe kombucha frå Ask Brygghus i Oslo inneheld grøn te, humle og honning, og er ein sprudlande og forfriskande drikk. Kombucha er fermentert, dvs. at det inneheld mjølkesyrebakteriar, som har ord på seg for å vera bra for fordøyelsen. I tillegg skal kombucha innehalde mange antioksidantar, vitaminar og mineral.

Torsdag, fredag og laurdag må du gjerne koma innom for å smake på denne kombuchaen. Velkomen!

Ask brygghus er eit økologisk alkoholfritt brygghus med produksjon av økologisk kombucha, ingefærøl, jamu-jamu og andre sunne, gode drikkar.

 

Vekesprodukt: Honningrista müsli frå Stokke

Denne veka vil vi gjerne gjera den smakfulle honningrista müslien frå Den Gode Baker i Stokke i Vestfold litt betre kjend. Müslien inneheld havregryn, honning, solsikkekjerner, hasselnøtter, sultaner, bokkveite, sesamfrø og linfrø, og ingrediensane er i den grad det er mogleg frå norsk landbruk.

Müslien kan du komma innom og få smake på torsdag, fredag eller laurdag!

Litt info om produsenten:
Den Gode Baker vart starta opp i liten skala i Sandefjord av danske Kim Christoffersen, ein tidlegare fabrikkblautkakebakar som hadde vorte inspirert av økologisk produksjon på Camphill-landsbyen Vidaråsen. Kim ville ikkje ha meir halvfabrikat og tilsetnadsstoff i bakinga si, og Den Gode Baker er nå ein av dei største leverandørane av økologiske bakevarer i Norge, som òg brukar lokale samarbeidspartnerar så sant dette går an.